يعني إيه بطانة الرحم المهاجرة؟
بطانة الرحم المهاجرة (الاسم العلمي: Endometriosis) هي حالة بتحصل لما نسيج شبيه ببطانة الرحم يبتدي ينمو بره الرحم، زى على المبايض، قنوات فالوب، أو حتى في الحوض. النسيج ده بيتأثر بالهرمونات زي ما لو كان جوه الرحم، يعني بيتكون وبيتفتت مع كل دورة شهرية، بس لأنه مش في مكانه الطبيعي، الجسم مبيعرفش يتخلص منه، فبيسبب التهابات، التصاقات، وألم شديد.
أعراضها عاملة إزاي؟
-
وجع جامد أثناء أو قبل الدورة الشهرية (مش الوجع العادي اللي كل البنات بتحس بيه).
-
وجع أثناء أو بعد العلاقة الزوجية.
-
صعوبة في الحمل أو تأخر الإنجاب.
-
وجع في أسفل الضهر أو في البطن.
-
مشاكل في التبول أو الإخراج وقت الدورة.
مين ممكن يجلّها؟
بطانة الرحم المهاجرة ممكن تصيب البنات من بعد البلوغ لحد سن الأربعينات، لكن أغلب الحالات بتظهر في التلاتينات.
الإحصائيات بتقول إيه؟
-
حوالي 10% من الستات في العالم بيعانوا من بطانة الرحم المهاجرة.
-
في مصر، للأسف مافيش أرقام دقيقة، لكن تقديرات غير رسمية بتقول إن واحدة من كل 10 ستات ممكن تكون مصابة.
-
حوالي 30-50% من الستات اللي عندهم بطانة الرحم المهاجرة بيواجهوا مشاكل في الإنجاب.
بتتأخر ليه في التشخيص؟
كتير من البنات بيفتكروا إن الوجع ده طبيعي، والدكاترة أحيانًا بيقولوا نفس الكلام! وده بيخلي تشخيص الحالة يتأخر لحد ما الأمور تسوء. في المتوسط، بيعدي من 7 لـ 10 سنين من أول ظهور الأعراض لحد ما الحالة تتشخص صح!
هل ليها علاج؟
آه، بس مش شفاء نهائي في كل الحالات. العلاج ممكن يكون:
-
أدوية هرمونية لتقليل نمو النسيج المهاجر.
-
مسكنات للألم.
-
جراحة منظار لو الحالة شديدة أو فيها التصاقات.
-
لو في تأخر حمل، ممكن نلجأ لـ الحقن المجهري.
الخلاصة:
بطانة الرحم المهاجرة مش وجع “دورة” وخلاص. هي مرض مزمن محتاج وعي وتشخيص بدري عشان ميأثرش على الخصوبة ولا حياة الست اليومية. لو بتحسي بألم مش طبيعي، متسكتيش عليه، وكلمي دكتور نسا متخصص.
أ.د تامر دياب
استشارى امراض النسا والتوليد والحقن المجهرى