لعقم غير المفسر… لما كل التحاليل تطلع سليمة وبرضه مفيش حملا!

فيه ستات ورجالة بيعيشوا في دوامة التأخر في الحمل، يروحوا يعملوا تحاليل وفحوصات… وكل حاجة تطلع كويسة!
لكن السؤال اللي بيوجع هو: ليه مفيش حمل؟
وهنا بييجي التشخيص اللي ناس كتير أول مرة تسمعه: “عقم غير مفسر” أو زي ما الأطباء بيقولوا عليه:
Unexplained Infertility

🤔 يعني إيه “عقم غير مفسر”؟

ده ببساطة بيكون لما الزوجين بيحاولوا يخلفوا بقالهم أكتر من سنة (أو 6 شهور لو عمر الزوجة فوق 35)، وكل التحاليل اللي اتعملت ليهم مفيهاش أي مشكلة واضحة:

• التبويض مظبوط

• الحيوانات المنوية كويسة

• الرحم سليم

• الأنابيب مفتوحة
  وبرغم كده… مفيش حمل!📊 إحصائيات مهمة:

• حوالي 10% إلى 20% من حالات تأخر الحمل بيتم تشخيصهم على إنهم “عقم غير مفسر”.

• في مصر، النسبة دي بتقرب من 15% حسب بيانات بعض مراكز الخصوبة.

• دراسات عالمية بتقول إن فرصة حدوث الحمل الطبيعي خلال سنة من التشخيص بتوصل لـ 25% لـ 30% من الحالات، خصوصًا لو السن صغير.

🩺 طيب إيه الأسباب اللي ممكن تكون ورا العقم غير المفسر؟

رغم إن مفيش سبب واضح بيبان في التحاليل، الأطباء بيقولوا إن ممكن يكون فيه حاجات صغيرة مش بنعرف نكتشفها بسهولة، زي:

• مشاكل دقيقة في البويضات أو الحيوانات المنوية مش بتبان في التحاليل العادية

• ضعف في التخصيب أو الانغراس

• خلل مناعي بسيط

• اضطرابات في بطانة الرحم

• أو حتى توتر نفسي وعصبي مأثر على الخصوبة

💡 الحل بيكون إزاي؟

العلاج بيختلف من حالة للتانية، بس غالبًا بياخد خطوات تدريجية زي:

1. تنشيط التبويض مع تحديد أيام التبويض بدقة

2. تلقيح صناعي (IUI)

3. ولو مفيش نتيجة، بيكون الحل الأفضل:
   الحقن المجهري (IVF)، وده بيكون له نسب نجاح كويسة جدًا في الحالات دي.

💬 نصيحة لكل زوجين:

لو فات أكتر من سنة ومفيش حمل، حتى لو التحاليل كلها كويسة، متستناشوا أكتر.
زوروا دكتور خصوبة متخصص، وابدأوا خطوات العلاج بهدوء وبثقة.

 د. احمد حجازي  

استشاري امراض النسا والولاده والحقن المجهري