سرطان الثدي من أخطر الأمراض اللي بتواجه الستات، لكن اكتشافه بدري بيخلي نسبة الشفاء منه عالية جدًا. المشكلة إن كتير من الستات مش بياخدوا بالهم من الأعراض غير لما يكون الموضوع اتطور. علشان كده، لازم تكوني عارفة جسمك كويس، وأي تغيير مهما كان بسيط، لازم تاخدي بالك منه.
إيه هي الأعراض اللي مينفعش تتجاهليها؟
🔴 كتلة غريبة أو تورم في الثدي أو تحت الإبط
لو حسيتِ بحاجة غريبة في صدرك أو تحت الإبط، حتى لو مش بتوجع، متتجاهليش الموضوع. مش كل ورم بيكون سرطان، بس لازم الدكتور هو اللي يحدد.
🔴 تغيّر في شكل أو حجم الثدي
لو لقيتِ إن شكل أو حجم ثديك بقى مختلف، أو فيه جزء في الجلد داخل لجوه، لازم تستشيري طبيب فورًا.
🔴 إفرازات غير طبيعية من الحلمة
لو لاحظتي إفرازات شفافة، دموية، أو لونها غريب من الحلمة، حتى لو مش بتشعري بألم، متتأخريش في الفحص.
🔴 تغيرات في الجلد
حكة مستمرة، احمرار، أو تقشر الجلد على الثدي ممكن يكون علامة خطر، خصوصًا لو المكان بقى سميك أو مجعد زي قشرة البرتقال.
🔴 ألم مستمر في الثدي أو تحت الإبط
مش كل ألم في الصدر معناه سرطان، لكن لو الألم مستمر ومش مرتبط بالدورة الشهرية، يبقى لازم تتأكدي من السبب.
طب لو لقيتِ حاجة غريبة.. تعملِ إيه؟
أول خطوة هي إنك متتوتريش، لأن مش كل حاجة غريبة معناها سرطان، لكن برضه متكسليش! روحي لطبيب متخصص، وهو هيطلب منك فحوصات زي الماموجرام أو السونار علشان يحدد المشكلة بالضبط.
ازاي تحمي نفسك؟✔ افحصي ثديك مرة كل شهر بنفسك.
✔ اعملي ماموجرام بشكل دوري بعد سن الـ 40 أو لو عندك تاريخ عائلي للمرض.
✔ خدي بالك من نظامك الغذائي وصحتك العامة.
✔ ابعدي عن التدخين والكحوليات، لأنهم بيزودوا الخطر.
د اسلام عبدالحليم
استشاري جراحة الاورام